Ухамсар?

Хүн бүр ухамсартай ч, хүн бүр харилцан адилгүй араншинтай байдаг. Нэг эхээс төрсөн хоёр ихэр хүүхдийн ааш араншин ч адилгүй байдаг. Аав хүү хоёрын зан араншинд төстэй зүйл байдаг ч бүх талаараа ив ижилхэн байдаггүй. Ээжтэйгээ, аавтайгаа адилгүй араншинтай хүүхдийн ухамсар хаанаас ирсэн байж таарах вэ? Эхээсээ ухамсараа өвлөж төрсөн бол эхтэйгээ л ижилхэн зан араншинтай байх ёстой. Хэрвээ бурхан бүтээсэн бол ямар ч утгагүй болно: эрх чөлөө, жаргал, зовлонгийн тухай асуултууд өнөөх бурханыг ямар ч хариултгүй болгож онигоонд оруулна. Ухамсар алимнаас, модноос, галнаас, уснаас, нарнаас үүссэн гэвэл, хүнээс 15 толгойтой, ногоон арьстай сайн үүлдрийн үнээ төрсөнөөс ялгаагүй утгагүй хэрэг болно. Ухамсар хаанаас ирсэн байх вэ?

Published with Blogger-droid v2.0.9

Буддизмыг хэрхэн үгүйсгэх вэ?

Амьд амьтан бүхэн урьд төрөлдөө үйлдсэн үйлийнхээ үр дүн нь юм, Ертөнцийг Бурхан бүтээгээгүй, Ертөнцөд эхлэл гэж байдаггүй, Ертөнц тэргүүлшгүй цагаас (ертөнцөд эхлэл гэж байхгүй учраас цаг хугацаанд ч мөн адил эхлэл гэж байхгүй) үүсэн устаж оршсоор ирсэн, Тоолшгүй олон төрлийн амьтан, тоолшгүй олон төрлийн ертөнц бий, Орчлонд хэмжээ хязгаар үгүй, Амьд амьтан бүхэн сэтгэлдээ буй муу муухай бүхнийг арилгаж Бурхан (Будда) болох боломжтой, Зовлонгоос гэтлэх боломжтой, Тоолшгүй олон Бурхан байдаг, ухамсар нь юмсыг танин мэдэх мөн чанартай гэх мэт Буддын шашны бүх номлол "ЮМС БҮХЭН ШҮТЭН БАРИЛДАЖ ГАРСАН" гэх энэ онолд л тулгуурладаг. Буддизмыг үгүйсгэж, худал гэж батлах хэрэг гарвал "ЮМС ШҮТЭН БАРИЛДАЖ ГАРСАН" буюу "ЮМС БИЕ БИЕНЭЭСЭЭ ХАМААРАЛТАЙ ОРШДОГ" гэх энэ онолыг л үгүйсгэх хэрэгтэй. Хойт төрөл байдаггүй гэдгийг батлахыг хүсвэл ЮМС ӨӨРИЙН МӨН ЧАНАРААСАА ЮУНААС Ч ХАМААРАЛГҮЙ БИЕ ДААЖ БҮТСЭН ГЭЖ БАТЛААД (эсвэл ертөнцийн эзэн бүтээсэн гэж батлаад), юмс ХООСОН ЧАНАРТАЙ гэдгийг үгүйсгэх хэрэгтэй.
Хялбарчилбал: Алимны модноос алим ургаагүй, алим юунаас ч хамааралгүй өөрөө бие даан бүтсэн гэж батлах хэрэгтэй. Түүнээс биш амьдрахын эрхээр лам дээл өмсөөд амьтны мухар сүсгээр ар гэрээ тэжээж буй хүмүүсийн увайгүй үйлдлээр Буддизмыг хоосон үгүйсгэх нь утгагүй хэрэг. Монголын түүх, манжийн дарлал, Төвдүүдийн өнөөгийн байдал, Библи, Коранаар эсвэл хэн нэгэн их мэдэгчийн амны пянгаар бурсан хоосон үгсээр Буддизмыг үгүйсгэх нь тэнэг хүний л хийх хэрэг. Үнэхээр л Буддизмыг үгүйсгэмээр байгаа бол Буддизм ямар онолд суурилж байна, түүнийг нь л үгүйсгэх хэрэгтэй.

Далай Багш "Universe In A Single Atom" номныхоо өмнөтгөлд: "Буддизм болон шинжлэх ухааны аль нь ч бодит байдлын мөн чанарыг эрж хайхдаа нарийн шинжилгээний аргыг баримталдагт л миний гол итгэл үнэмшил оршдог бөгөөд үүнээс улбаалан би өөртөө итгэлтэйгээр шинжлэх ухааныг судалдаг. Хэрвээ шинжлэх ухааны нарийн шинжилгээгээр Буддизмын үзэл баримтлал эндүү, ташаа болохыг баталгаатай нотлох юм бол бид эрдэмтдийн судалгааны үр дүнг гарцаагүй хүлээн зөвшөөрч, эндүүрсэн бүхнээ залруулах хэрэгтэй." гэж бичсэн байдаг.

Хэн нэгэн Буддизмыг ойлговол, сав шим ертөнцийн орших байдал ямар мэт болохыг мэдэж, шалтгаан нөхцөл нь бүрэлвэл үр дүн нь гарцаагүй гардаг болохыг ухаарч чадвал өдөр бүр сэтгэл оюунтайгаа ажилладаг л болох байх даа...
Ай хөөрхий гэж...

Published with Blogger-droid v2.0.9

Үүнийг битгий уншаарай!!!

Хэдэн зуун жилийн турш Халх, Өвөр монгол, Ойрд, Буриад, Тагна Урианхай (Тува), Халимаг гээд монгол туургатнуудын оюун санааг Бурханы Шашин, Богд Жавзандамба Хутагтууд нэгтгэсээр ирсэн билээ. Талцаад хуваагдаад унахаараа л бусдын тавган дээр бэлэн хоол болоод байдаг монголчууд оюун санааны хувьд нэгдмэл байх нь мэдээж муу зүйл биш.

Бүх монгол туургатнууд оюун санаагаараа нэгдмэл байх боломж өдий хүртэл байсаар. Энэтхэгт цагаачлан сууж буй Дээрхийн Гэгээн XIV Далай Лам нэгэн удаа номоо айлдаж эхлэхийнхээ өмнө <<Монгол туургатнууд байна уу?>> гэж асуухад Монгол, Буриад, Халимаг, Тувагаас ирсэн монголчууд хоёр гартаа цэнхэр хадаг өргөөд “хурай, хурай” хэмээн шуугилдаж байсан гэдэг. Миний бие жил гарны өмнө энэтхэгт Бурханы ном үзэхээр цагаачлан ирсэн өвөр монгол лам нартай уулзах завшаан тохиож, ярилцаж байхад тэд, манай (өвөр) монголчууд Бурханы номоо сайн мэдэхгүй ч өнөө хир Бурханы шашинд сүжиглэсээр байна хэмээн ярьж байв. Халимагийн ерөнхийлөгч асан Кирсан Илюмжинов америк дахь халимагуудын дундаас тодорсон Дилав Хутагтын хойд дүрийг халимагт залж, шашны тэргүүнээр өргөмжлөв. Буриадад дэлхий дахиныг шуугиулж буй, нууц тарнийн гүн бясалгалд оршсон Итгэлт Хамбын лагшин бие ил болж олон түмний Буддын шашинд итгэх итгэлийг сэргээж байна. Тувагийн томчууд олон түмэнд Бурханы шашнаа таниулах тал дээр анхаарч гаднаас ном эрдэмтэй лам нарыг залдаг гэсэн. Монголд, урьд шашин төрийн хэргийг үүрч байсан Зая Гэгээн, Ламын Гэгээн, Жалханз Хутагт, Манзушир Хутагт нарын хойд дүрүүд тодорч, IX дүрийн Богд Жавзандамба Хутагт монгол оронд эргэж төрөхөө амлаад нирваан болов. Бурханы шашны мөн чанарыг ойлгосон залуус нэгдэн нийлж сургалт, лекц зохион байгуулах болов.

Хувь заяаны эрхээр тасарсан монгол туургатнууд оюун санааны хувьд нэгдмэл байх боломж одоо хүртэл байсаар л... Монголын сүсэгтнүүд X Богдоо хүлээсээр...

Магадгүй 10 жилийн дараа, X Богд тодорч, монголын Бурханы шашин сэргэх (хүмүүсийн Бурханы шашны талаарх мэдлэг дээшилж, амьдрахын эрхээр, хоол олохын тулд мэргэ төлөг, гүрэм засал хөөж, лам дээл өмссөн мухар сүсгийн бизнесмэнүүдийн зах зээл үгүй болох) тэр үед Монголчууд бид Буриад, Халимаг, Тува, Өвөр монголоос хэн ч ирж суралцаж болох Бурханы Шашны Их Сургууль байгуулж, тэндээ Буддизмаас гадна монгол хэл, бичиг, түүх заадаг болбол монгол туургатнууд ирж суралцах л байх даа хөөрхий... Магадгүй 10 жилийн дараа...

1990-ээд оны үед Арилд Зэмбэ гэдэг нууц нэртэй баачка...

1990-ээд оны үед Арилд Зэмбэ гэдэг нууц нэртэй баачка (энэ нууц нэр нь байх?) Ардын Эрх сонины нэг дугаарт: Эрдэмтэд хоосон чанарыг нээлээ, тэр нь цахилгаан соронзон орон л юм байна, хэдэн арван зууны турш тайлагдашгүй нууц байсан хоосон чанар ийнхүү нээгдлээ гээд элийрч өгсөнийг зохиолч Дарам.Батбаяр гуай үгүйсгэж байв. Мэдэхгүй юмаа мэддэг юм шиг цариалж байгаад улайхгүй бурдаг гаруудад хулхидуулахгүйн тулд, оюун санаагаа хогоор дүүргэхгүйн тулд өөрөө өөрийнхөө ухаанаар баталгаатай, нотолгоотой мэдэхээс өөр арга байдаггүй. Их мэдэгч, их бураачингууд хэзээд байсаар, гай тарьсаар ирсэн. Тиймээс өөрийнхөө шинжлэл төгөлдөр оюун ухаандаа л найдах хэрэгтэй шүү! Найз нар аа!

Published with Blogger-droid v2.0.9

Туулах л хувьтай амьдралыг Уурлаад яаж барахав дээ гэж...

Эргэн тойронд хүмүүс таны тухай, таниас өөр хүний тухай хов ярина. Аадар бороо, аянга цахилгаан, хурц нар, хуурай салхи салхилна. Эргэн тойронтойгоо зохицож ус мэт, эсвэл хоосон огторгуй адил болохоос өөр ухаалаг, зөв, сайхан сонголт байна гэж үү? Ингэж зохицож чадвал л дотоод сэтгэлээ амар амгалантай байлгаж чадах билээ.
Туулах л хувьтай амьдралыг
Уурлаад (стрессдээд) яаж барахав дээ гэж...

Published with Blogger-droid v2.0.9

Туулах л хувьтай амьдралыг Уйлаад яаж барахав дээ...

Өнөөдөр та юунд ч гомдоллохгүй байхыг хичээгээрэй. Тэртээ тэргүй нэгэнт болж байгаа болон болоод өнгөрчихсөн юманд гомдоллоод тус болохгүй.
Нөгөө "Жинжиймаа" гэдэг кинон дээр нээх гоё нүдтэй хүүхэн гарч ирээд
"Туулах л хувьтай амьдралыг
Уйлаад яаж барахав дээ" гээд дуулдаг шиг...
Туулах л хувьтай амьдралыг
Гомдоллоод яаж барахав дээ гэж...

Published with Blogger-droid v2.0.9

Зовлонгоос гэтлэх тухай Буддизмын онол

Буддистуудын яриад байдаг зовлонгоос ангижрах арга нь их энгийн. Сэтгэлийн зовлонгууд нь бидний доторх бодит байдлыг эс мэдсэн, эс таньсан буруу бодлуудaac шууд хамааралтай байдаг. Бодит байдлыг эс таньсан ухамсрыг бодит байдлыг байгаагаар нь таньсан ухамсар л устгаж чадна. Газар хэвтэх олсыг могой гэж буруугаар таньсан ухамсарыг газар хэвтэх олсыг могой биш олс юм байна гэж зөвөөр таньсан ухамсар л устгаж чадна. Эхнийхийг нь Буддизмд эс мэдсэн мунхаг гэдэг бол удаахыг нь билиг ухаан гэдэг. Буддизмын зовлонгоос гэтлэх ерөнхий онол ердөө л энэ: зовлонгийн шалтгааныг хайж олоод арилгах, өөрт байгаа буруу бодлуудаа арилгах. Буруу бодлуудаас, өөрөөр хэлбэл мунхагаас л уур, шунал, тачаал, атаа хорсол, омог гээд биднийг зовоогоод, дотоод сэтгэлийг хямраагаад байдаг зовлонгууд үүсдэг. Зовлонгоос ангижрах буддизмын ерөнхий онол ердөө л энэ. Мэдээж хэлэхэд амархан хийхэд хэцүү. Гэвч зовлонгоос гэтлэх өөр арга байхгүйгээс хойш шүдгүй ч гэсэн буйлаараа мэр гэдэг шиг чадлаараа зүтгэхээс өөр сонголт байдаггүй... Зовох дуртай бол заавал энэ сонголтыг хийх албагүй л дээ... Зиа за Буддизмийн тухай нэг иймэрхүү...

Published with Blogger-droid v2.0.9

Хүүхэд насанд хүргэж өгдөг галт тэрэг хоёр хөдөлгүүртэй

Юунд ч санаа зовох зүйлгүй инээж хөхрөөд л...

Өглөөний муухайг өдөртөө мартаад л...

Уйлсан ч, уурласан ч цагаахан хүүхэд нас минь...

Хэнд ч, юунд ч, ямар ч тооцоо бодолгүйгээр манайхан танайхан гээд мод чулуугаар буу шийдэм хийж тоглоод л...

Үлгэрт үнэн зүрхнээсээ итгээд л... Арван таван толгойтой Атгаалжин хар мангасыг дарчихаад амар сайхандаа жаргах юм шиг мөрөөдөөд л...

Амттанд дурлаад л... Холын гийчинг бурхан шиг бишрээд л...

Мөнгө хэмээх эрээн цааснаас ч илүү үнэтэй цагаан цаасан дээр нар сар хоёрыг зэрэг мандуулаад л...

Уултай, устай, ой мододтой, ургамал амьтантай ногоон талд Асар, Басар нохойтой айл зураад л...

Мөнгийг тав, арав гэлгүй тавын гаа, арвын чихэр гэж тоолоод л...

Хүүхэд насанд хүргэж өгдөг галт тэрэг хоёр хөдөлгүүртэй: нэг нь сайхан сэтгэл, нөгөө нь билиг ухаан. Мухар сүсгээр биш бүтээлч сэтгэлгээгээр хандаж чадвал хүн бүр Буддизмаас өөртөө хэрэгтэй зүйлийг олж чаддаг билээ гэж...

Published with Blogger-droid v2.0.9

Архинд засагддаг сэтгэл гэж хаашаа харсан юм байхав дээ?

Бидний дотор байдаг буруу, атгаг, өнгөц бодлууд биднийг ганцаардмал, өрөвдөлтэй, гунигтай, тэнэг байдалд оруулах чадамжтай байдаг. Бид нар үнэндээ хэн нэгнээс болоод биш, өөрөө өөрсдийнхөө дотор байгаа буруу бодлуудынхаа эрхэнд ороод л гуниг гутралд ордог. Дараа нь сэтгэл санаагаа засна гээд архи дарс уугаад эрүүл биеэ алдаг. Архинд засагддаг сэтгэл гэж хаашаа харсан юм байхав дээ? Бидний дотор байдаг эрүүл бус буруу бодлууд түм буман тэнэг үйлдлүүдийн өдөөлгө болдог. Тиймээс л дотоод сэтгэлийн эрүүл мэнд маш чухал юм. Дотоод сэтгэлдээ анхаарал хандуулахгүй бол бид буруу бодлууддаа хулхидуулсаар хүний насыг барна. Энэ бичлэгээрээ би хэн нэгнийг сүрдүүлээгүй байх гэж найдаж байна...

Published with Blogger-droid v2.0.9

Заримдаа би...

Заримдаа би яг л хувраг хүн шиг Зовлонт цогцсоосоо ангижрахыг хүснэ Балчиг шавар халдаагүй Бадам цэцэг шиг дэлгэрэхийг хүснэ Зөгийн чуулган Над дээр чуулж Шимт балыг Надаас хүртээд л... Заримдаа би яг л бадам цэцэг шиг Балчиг дундаас дэлгэрэхийг хүснэ...

Баабар гуайгаа муулангаа Богд Зонховыгоо жаал магтав...

Бурхан Багш бадар барин морилж явах үед нэгэн балчир хүүхэд Бурхан Багшид зуун найман болор эрхи өргөсөн гэдэг. Бурхан Багш энэ явдалд ихэд баяcан шавь нартаа хандан: "Энэ хөвгүүн хожимын цагт шашин доройтох үед Сумади хэмээх гэлэнгийн дүрээр шашныг мандуулах болой. Түүний шашин энэ болор эрхи мэт хир үгүй тунгалаг байх болно" хэмээн эш үзүүлсэн гэдэг. Тэр цагт Бурхан Багшид болор эрхи өргөсөн хөвгүүн нь Богд Зонхов Лувсандагвын дээд төрөл байсан юм. Сумади гэдэг нь Сайн Оюунт гэсэн утгатай санскрит үг. Төвдөөр бол Лувсан юм.

Манзушир Бурхан бодитоор залран ирж Богд Зонховт ном заадаг байсан гэдэг.

Тэрээр өөрийн багш Рэндааваад зориулан залбирал зохион өргөхөд багш нь: "Энэ магтаал надад биш, чамд илүү зохих юм байна" хэмээгээд өөрийнхөө нэрний оронд Богд Зонховын нэрийг бичээд буцаагаад өргөсөн нь Гэлүгба нарын уншдаг мигзэм хэмээх залбирал юм. Мигзэмийг монголчилвол:

Зоригдол үгүй энэрэлийн их хуу сан Жанрайсиг
Хир үгүй айлдлын эрхэт Манзушир
Шулмасын өмгийн хоцроолгүй даран зоxиогч Очирваань
Цастын мэргэдийн оройн чимэг Зонхова
Лувсандагвын өлмий дор соёрхол талибъя гэсэн утгатай...

Богд Зонховын тухай нэг иймэрхүү. Хүний амьдрал гэж сонин байх юм. Жоохон байхад сургуульд Шарын шашин, Богд Зонховыг муулсан түүхийн хичээл ордог байв. Монгол улс доройтсон гол шалтгаан нь явж явж Богд Зонхов болж таардаг байв. Богд Зонхов, Шарын шашны тухай 20 хүртлээ өөдтэй юм бараг дуулж байсангүй. Гэтэл өнөөдөр Богд Зонховынхоо фэн нь болчихсон явж байдаг. Хамгийн сүүлд 3 жилийн өмнө Баабар гуайн "Нүүдэл Суудал"-аас  Богд Зонхов, Шарын шашин хоёрыг муулсан юм уншаад "хүн ер нь мэдэхгүй зүйлийнхээ тухай дуугай байвал зүгээр юм байна" гэж бодож билээ. Баабар гуай Барууны нэг ядмагхан судлаач баачкагийн бичсэн юмыг олж уншчихаад л Шарын шашныг тэр үед баахан муулсан байх. Шарын шашныг муулсан түүний нийтлэлийн дараахан Энэтхэгт олон жил Бурханы ном үзсэн Нямсамбуу гэдэг залуу "Шашнаа өмөөрөхүй" гээд хариу нийтлэл бичсэн юм. Тэрнээс хойш Баабар гуай Шарын шашны тухай дуугарахаа больсон. Бодвол миний өмнө бодсонтой ижил зүйл бодсон байх.
Ай хөөрхий гэж... Уул нь Богд Зонховын тухай жоохон юм бичье гэж бодсон чинь дашрамд нь Баабар гуайгаа муулчихлаа. Нэгийг нь сайлахын тулд нөгөөг нь муулдаг зан бол их муухай зан л даа. Гүй одоо яая гэхэв дээ, цагаан дээр хараар, улаан цайм Богд Зонховын талаар баахан ташаа юм биччихсэн байгаа юм чинь... Фэн нь ухаантай юм чинь би гэдэг хүн бас яаж зүгээр байхав дээ...

Published with Blogger-droid v2.0.9

Дахиад л үхлийн тухай

Хорвоогийн нэг өдөр өнгөрлөө. Өдөр хоног өнгөрөх бүр, бид нар үхэлд ойртдог. Ирээдүйд зайлшгүй, гарцаагүй тохиох зүйлд бэлтгэлтэй байх нь мэдээж муу зүйл биш. Юу ч бэлдээгүй байж байтал, гэнэт л нэг тийш зайлшгүй нүүх хэрэгтэй болбол сандарч мэгдээд бөөн юм болох нь ойлгомжтой. Эцсийн мөчид бид барьц алдахгүй байх хэрэгтэй. Энэ бол маш чухал. Хорвоогийн нүүдэл суудалаа гэж... Ай хөөрхий гэж...

Published with Blogger-droid v2.0.9

Өөрийгөө би хоосон хэмээн сэтгэнэ...

Өөрийгөө би хоосон хэмээн сэтгэнэ
Өрөөлийн шидсэн чулуу
Өр зүрхийг минь онохгүй.

Өөрийгөө би хоосон хэмээн сэтгэнэ
Үдшийн жихүүн салхи намайг
Торох үгүй нэвтлээд л...

Өөрийгөө би хоосон хэмээн сэтгэнэ
Гэрэлд дураараа уусна
Сүүдэр ч үгүй.

Өөрийгөө би хоосон хэмээн сэтгэнэ
Чих үл сонсоно
Чимээ аниргүй.

Өөрийгөө би хоосон хэмээн сэтгэнэ
Өрөөл рүү шидэх чулууг
Атгаж үл чадна.

Өөрийгөө би хоосон хэмээн сэтгэнэ
Өрөөл дээр тусах нарны гэрлийг Сүүдэрлэж үл чадна.

Өөрийгөө би хоосон хэмээн сэтгэнэ
Дайсан ч үгүй, садан ч үгүй
Тачаал, шунал, уур үгүй.

Өөрийгөө би хоосон хэмээн  сэтгэнэ
Тулах ч үгүй, торох ч үгүй
Тув тунгалаг.

Өөрийгөө би хоосон хэмээн сэтгэнэ
Өнгөт орчлонгийн үзэгдэл бүхнийг
Өөртөө уусгана.

Өөрийгөө би хоосон хэмээн сэтгэнэ...

Published with Blogger-droid v2.0.9

Өөрийгөө би хоосон хэмээн сэтгэнэ.

Өрөөлийн шидсэн чулуу
Өр зүрхийг минь онохгүй
Өөрийгөө би хоосон хэмээн сэтгэнэ.

Үдшийн жихүүн салхи намайг
Торох үгүй нэвтлээд л...
Өөрийгөө би хоосон хэмээн сэтгэнэ.

Гэрэлд дураараа уусна
Сүүдэр ч үгүй
Өөрийгөө би хоосон хэмээн сэтгэнэ.

Чих үл сонсоно
Чимээ аниргүй
Өөрийгөө би хоосон хэмээн сэтгэнэ.

Өрөөл рүү шидэх чулууг
Атгаж үл чадна
Өөрийгөө би хоосон хэмээн сэтгэнэ.

Дайсан ч үгүй, садан ч үгүй
Тачаал, шунал, уур ч үгүй
Өөрийгөө би хоосон хэмээн сэтгэнэ.

Тулах ч үгүй, торох ч үгүй
Тув тунгалаг
Өөрийгөө би хоосон хэмээн сэтгэнэ.

Өөрийгөө би хоосон хэмээн сэтгэнэ
Өнгөт орчлонгийн үзэгдэл бүхнийг
Өөртөө уусгана.

Өөрийгөө би хоосон хэмээн сэтгэнэ...

Published with Blogger-droid v2.0.9

Энэ жишээн дээр анализ хийе...

Аливаа юмс яг л бидний бодсон шиг оршин байдаг гэж бид нар итгэдэг. Жишээ нь: нэг эр нэгэн эмэгтэйг харлаа гэж бодъё. Тэр эр эмэгтэйн өнгө зүс, бие галбир гээд гадаад үзэмж байдлыг харсан дариудаа л "энэ үнэхээр сайхан эмэгтэй байна" гэж бодлоо гэж бодъё. Энэ мөчид мань эр тэр хүүхнийг яг л өөрийн бодсон шигээ "бодит байдалд ч гэсэн тийм л сайхан хүн" гэж өөрийн эрхгүй бодлоо гэж бодъё. Улмаар мань эр тэр эмэгтэйтэй танилцахыг, ойр байхыг хүснэ. За тэгээд нөгөө эмэгтэй нь ч гэсэн мань эрд нүүр өгөөд л, хоёр биенээ сайхнаар төсөөлөөд л, ээрч муураад л солонгос кинон дээр гардаг шиг хайр дурлал өрнөлөө гэж бодъё. Энэ явдлаас хойш нэг эсвэл хоёр жил, эсвэл хоёр юмуу гурван сар өнгөрлөө... Oдоо мань эрийн тэр эмэгтэйн талаархи анхны бодлууд өөрчлөгдөж ирнэ: Унтахдаа хурхирдаг юм байна. Ядаж долоо хоногтоо нэг удаа усанд орж байхгүй бол биенийх нь үнэр танар гэж хэцүүдэх шинжтэй юм байна. Маш их яриа. Бас их хардамтгай. За тэгээд уурлуулах юм бол бүүр ч аймаар болдог юм байна гээд л, эмэгтэйн зан чанарыг таньж эхэлнэ. Цаашид мань эрийн ухаан хүрээд бүсгүйн талаархи анхны бодлууддаа хулхидуулсан болохоо ойлголоо гэж бодъё... Зиа энэ бол жишээ. Одоо энэ жишээн дээр анализ хийе. Энэ бол хэн нэгнийх нь буруу биш. Тэр тусмаа эмэгтэйн ч буруу биш.

Бидний аливаа юмсын талаархи бодсон бодлууд - яг л бодсон шиг минь бодит байдалд ч гэсэн тийм л байдаг гэсэн атгаг бодлууд - юмсын оршин байгаа бодит байдлын талаархи буруу төсөөллүүд. Гол буруутан нь энэ л юм. Үүнийг Буддизмд мунхаг гэж нэрлэдэг. Энэ л мунхагийг зовлонгийн гол шалтгаан гэж Буддизмд үздэг. Бодит байдлын талаархи бидний бодлууд хир их үнэн учир шалтгаанд суурилсан байна, тэр төдийгөөр бид нар зөв шийдвэр гаргаж, зовлон багатай амьдарч чадах юм. Юмсын оршин байгаа бодит байдлын мөн чанарыг таньж чадвал, өөрөөр хэлбэл зовлонгийн гол шалтгаан болсон мунхагийг арилгаж чадвал зовлонгоос гэтэлж чадна гэж Буддизмд үздэг билээ... Овоо босгоогүй бол шаазгай юунд суух вэ гэдэг шиг л...

Published with Blogger-droid v2.0.9